Thursday, 28 July 2016

రాహుల్ గాంధీని కలవడానికి సాయం చేద్దురూ

ఈ ఉద్యోగాలు ఎన్నేళ్ళు చేసినా పెద్దగా మిగలబెట్టేదేమీ ఉండదని తీర్మానించుకున్నాక నేను, నా ఫిడేల్ ఫ్రెండు కలిసి ఒక కొత్త ప్రోడక్ట్ ను మార్కెట్ లో లాంచ్ చేద్దామనుకున్నాము. 

దీన్ని ప్రమోట్ చేయడానికి మొదట ఒక పాపులర్ హీరోయిన్ ను అనుకున్నాము. ఆవిడ గారి P.A తో మాట్లాడితే outdoor షూటింగ్ లో ఉన్నారావిడ , మీరు డైరెక్ట్ గా అక్కడికి రండి డీల్ మాట్లాడుకుందాము అన్నారు.

మేము వెళ్ళేప్పటికి ఆవిడ షూటింగ్ లో ఉండటం తో అది పూర్తయ్యేదాకా పక్కన నిల్చొని షూటింగ్ చూస్తూ ఉన్నాము

ఈ లోగా నా ఫిడేల్ ఫ్రెండు  దమ్ము లాగించాలని అనుకున్నాడు. లైటర్ ఎవరినైనా అడుగుదామని అటు ఇటు చూస్తే వెదకబోయిన తీగ కాలికి తగులుకున్నట్లుగా ఆ P.A చేతిలో అగ్గిపెట్టె  ఉండటం గమనించి అతన్ని అడిగాడు.

సార్ ఆ అగ్గిపెట్టె ఇస్తారా సిగరెట్ వెలిగించుకుని ఇస్తాను

ఇది అగ్గిపెట్టె కాదయ్యా

సార్ అది అగ్గిపెట్టె అని కనపడుతూనే ఉంది ..సిగరెట్ వెలిగించుకుని ఇప్పుడే ఇచ్చేస్తానండి

ఇది అగ్గిపెట్టే కానీ ఇందులో అగ్గి పుల్లలు లేవు... మా మేడమ్ గారి క్యాస్టూమ్స్ ఉన్నాయి అన్నాడు

ఇంతలో సన్నీలియోన్ షూటింగ్ ముగించుకొని మా దగ్గరికి వచ్చింది. మా ప్రోడక్ట్ గురించి డిస్కషన్స్ కూడా నడిచాయి. చివరకి రెమ్యూనరేషన్ అంతా O.K అయింది కానీ మేము పబ్లిసిటీ ఇవ్వబోయే ప్రోడక్ట్ కి ఆవిడ ఎందుకు అప్ట్ కాదో మాకు డిటైల్డ్ గా వివరించి వెనక్కు పంపించేసింది.

ఆ తర్వాత చాలా మంది హీరో లతో డీల్స్ జరిగాయి కానీ ఏవీ వర్కౌట్ కాలేదు. సల్మాన్ ఖాన్ ఓ.కే అన్నాడు కానీ పాపం చీమకి కూడా హాని తలపెట్టని ఆయన మీద మోపబడిన కేసు ల్లోంచి ఈ మధ్యే బయటపడినందుకు గానూ ఆరంజ్ క్రాస్, యెల్లో క్రాస్ లాంటి సంస్థలు "శాంతి దూత" లాంటి బిరుదులతో సన్మానించే కార్యక్రమాలకు అటెండ్ కావాల్సి ఉన్నందున ఈ యాడ్ చేయలేనని చెప్పారు. నోట్లో వేలు పెడితే కూడా కొరకని చంటి పిల్లాడి లాంటి సల్మాన్ ఖాన్తో ఏవో సెరిలాక్, డైపర్ యాడ్స్ చెయ్యొచ్చు గాని పెద్దవాళ్ళ బెడ్స్ లాంటివి చేయడం తగదని మేమూ నిర్ణయించుకున్నాము. 

నిన్నరాత్రి పోయిన వారం పేపర్ చదువుతూ ఒక్క సారిగా హుర్రే అని అరిచాను

బజ్జున్న మా బుడ్డమ్మ ఒక్క సారిగా ఆ అరుపుకు లేచి కెవ్వుమంది

ఎవరూ చూడటం లేదనుకొని గోడ వైపు తిరిగి చేతి వేలు నోట్లో పెట్టుకొని చప్పరిస్తున్న మా బుడ్డోడు ఉలిక్కిపడ్డాడు

గుమ్మడికాయ తో గుత్తివంకాయ ఎలా వండాలో నేర్పే ప్రోగ్రాం చూస్తున్న మా ఆవిడ నా వైపు తిరిగి చూసి గుర్రుమంది.

అవేమి పట్టించుకోకుండా తిరిగి పేపర్లోకి తలదూర్చాను. హుర్రే అన్ననా అరుపుకు కారణమైన ఫోటో ఇది



దొరికేసాడు నా యాడ్ కు కరెక్ట్ బ్రాండ్ అంబాసిడర్.  లోకసభ లో గోల గోలగా అంత సీరియస్ విషయం మీద డిస్కషన్ జరుగుతున్నపుడు కూడా నిద్ర పోతున్న యువరాజు గారు తప్ప ఇంకెవరూ సూటబుల్ కాదు అని డిసైడ్ అయ్యాను.

చింత లేనమ్మ సంత లోనూ సక్కగా నిద్దరోయిందని సామెత చెప్పినట్లు మన ఫారెక్స్ కూడా బేబీ పార్లమెంట్ లో ప్రశాంతంగా పడుకున్నాడు ఇంతకంటే కరెక్ట్ పర్సన్ ఇంకెవ్వరూ కనపడలేదు నా బ్రాండ్ ను ప్రమోట్ చేయడానికి. 

ఆయన్ని ఎలా అప్రోచ్ కావాలో మీలో ఎవరి కైనా తెలిస్తే చెప్పి పుణ్యం కట్టుకోరూ ప్లీజ్. మీకూ ఒక ఐదు పైసల వాటా ఇస్తాను లాభాల్లోంచి. 

నేను చెప్పనేలేదు కదూ ఆ ప్రోడక్ట్ ఏమిటో "Sleep Always" అనే కొత్త రకం పరుపులు విత్ ది కాప్షన్ 'You Will Get The Sleep Even After Getting Up From The Bed'. 

అలాగే ఆయన్ను కలిస్తే కొన్ని చిట్కాలు తీసుకోవాలి నిద్ర బాగా పట్టడానికి. 

ఏడ్చినట్లు ఉన్నాయి  ఈ "Sleep Always" బెడ్స్.  దీని మీద నిద్ర పట్టి చావట్లేదు ఆ పాత బెడ్ తీసుకొచ్చి వేయండి అని మా ఆవిడ గొణుగుతోంది ...  నేను వెళ్ళాలి.  తర్వాతి బ్లాగ్ లో కలుద్దాం. 





Wednesday, 27 July 2016

ఇప్పుడు డబ్బింగ్ సీరియల్స్ తోడయ్యాయి



2016 వ సంవత్సరం..అంటే నిన్నో మొన్నో


దేవుడు ప్రత్యక్షం ... ఏమయ్యా మళ్ళీ ఏమైంది...కబాలి సినిమాకి వెళ్లి బలి అయిన వాడిలా అలా మొహం పేట్టావేం


స్వామీ వచ్చేసారా .. ఈ సారి బాలిక వధూ ఉరఫ్ చిన్నారి పెళ్లి కూతురు వంతు

ఈ ఎనిమిది ఏళ్లలో సీరియల్ చూడటానికి అలవాటు పడిపోయి ఉంటావనుకున్నాను

అలవాటు పడేవాడినే కానీ ఇది వేరు స్వామీ.  ఆ సీరియల్ ఏమో హిందీ,తెలుగు, తమిళ్ బాషలలో వస్తుంది.  నా భార్యకు తెలుగు, తమిళ్, హిందీ, కన్నడ భాషలు వచ్చు కాబట్టి అన్ని భాషల్లో చూస్తుంది. ఒక భాషలో అయితే సరే కానీ అన్ని భాషల్లో అయితే కష్టం కదా స్వామీ

అన్నీ నా! ఎందుకు అని అడగకపోయావా?

అడిగానయ్యా..మీరే వినండి ఆ రాపిడ్ ఫైర్ సెషన్ 

నేను: ఆ సీరియల్ హిందీ లో ఎందుకు  చూస్తావ్
తను: లేటెస్ట్ ఎపిసోడ్స్ హిందీ లోనే ఫస్ట్ వస్తాయి కాబట్టి 

నేను: మరి తమిళ్ లో
తను: మొదట్లో హిందీ లో కొన్ని ఎపిసోడ్ లు మిస్  అయ్యాను అందుకు

నేను: మరి తెలుగులో 
తను: ఎంతైనా మన తెలుగులో చూస్తే అదో తుత్తి అందుకు.

బాగుందయ్యా.. ఎక్కువ భాషలు తెలిస్తే ఇలాంటి ఇబ్బందులు కూడా ఉన్నాయన్నమాట. అది సరే గాని ఇప్పుడు కాలం మారింది కదా మీ ఆవిడ సీరియల్ చూస్తోంటే నువ్వు నీ ఫోన్ లో ఏదో ఒక సినిమా చూస్కోవచ్చుగా

నా ఫోన్ లో సినిమానా!

ఏం నెట్ కనెక్షన్ లేదా?

ఉన్నా లాభం లేదు స్వామి

ఏం 

నా ఫోన్ ఇది స్వామి



ఇదేదో మ్యూజియం లో ఉండాల్సిందిగా ఉందే

అవును స్వామి అడుగుతున్నారు నేనే ఇంకో పదేళ్లు వాడి ఇద్దామనుకున్నా

అంత కాసుల కక్కుర్తి ఎందుకు కొత్తది  కొనుక్కోవచ్చుగా

మా అమ్మాయికి కిండర్ జోయ్స్, షాప్కిన్స్ లాంటి టాయ్స్ కొనడానికే జీతం సరిపోవడం లేదు స్వామీ

అదీ నిజమే చాలా మంది భక్తులు నా దగ్గర మొరపెట్టుకున్నారు ఈ విషయమై. అయినా ఆ దిక్కుమాలిన I.T జాబ్ వదిలేసి టాయ్స్ షాప్ పెట్టుకో స్కూల్ దగ్గరో పార్క్ దగ్గరో తొందరగా డబ్బు సంపాదించచ్చు. సరే ఆ టాబ్ లో ఏమన్నా మూవీ చూడచ్చుగా

దాంట్లో  మా అమ్మాయి కార్టూన్స్ చూస్తూ ఉంటుంది

కనీసం ఆ laptop లో ఏ సినిమాలో చూస్తూ కాలక్షేపం చేయొచ్చుగా

పోయిన సారి ఊరెళ్ళినప్పుడు laptop బాగా దుమ్ము పట్టిపోయిందని మా బామ్మ సర్ఫ్ లో నానబెట్టింది. అప్పటినుంచి అది పలకడం మానేసింది స్వామీ

ఇలా సీరియల్స్ స్టాప్ చేస్తూ పొతే ఆడవాళ్ళ పాపం నీకు తగులుకుంటుంది నాయనా

ఆ పాపాన్ని సీరియల్స్ అయిపోవడం వల్ల రిలీఫ్ అయ్యే మగవాళ్ళ ఆశీర్వాదం బాలన్స్ చేస్తుందిలెండి స్వామీ. మా బాపు రమణ ను మా నుంచి దూరం చేసినందుకైనా ఈ సాయం చేయండి స్వామీ

సరే నాలుగు సార్లు పిలిచావ్ ఇప్పటికే .. ఇక మళ్ళీ మళ్ళీ పిలవకు ..ఈ సారికి ఆ సీరియల్ అయిపోయేలా చూస్తాను

అలాగే స్వామి .. ఇంకో సీరియల్ స్టార్ట్ అయి అది ఏళ్ళ తరబడి సాగి నేను దాని బారిన పడేసరికి ముసలాడిని అయిపోయి పడక్కుర్చీలో కూర్చొని రిటైర్ అయిన మిగతా మగాళ్లలా నేనూ సీరియల్స్ చూడటం అలవాటు చేసుకుంటానులెండి స్వామి

P.S  బాలిక వధూ సీరియల్కి ముగింపు ఇస్తున్నారన్న వార్త విని అల్లిన పిచ్చి పోస్ట్

Monday, 25 July 2016

ముఖ్యమంత్రి ఇంకొకరి కాళ్ళు పట్టుకున్నట్లు కార్టూన్ వేయడం ఎంతవరకు సమంజసం?

ఒకానొక గ్రేటెస్ట్ పేరున్న వెబ్ పత్రికలో చంద్రబాబు కాళ్ళ బేరానికి వచ్చాడు అన్నట్లు ఒక ఆర్టికల్ రాసి అందులో ఆయన ఒకరి కాళ్ళు పట్టుకున్నట్లుగా కార్టూన్ వేశారు.

ఛా! ఏంటి ఇంత చెత్తగా జర్నలిజం తయారైందా అని బాధ కలిగింది. ఆయన సవాలక్ష తప్పులు చేసి ఉండవచ్చు కానీ మెజారిటీ జనం ఆయనకి ఓటు వేసి ముఖ్యమంత్రిగా ఎన్నుకున్నారు. ఆయనకి వ్యక్తిగతంగా గౌరవం ఇవ్వకపోయినా పర్లేదు కనీసం ఆయన ప్రస్తుత పదవిని గుర్తుపెట్టుకొని అయినా గౌరవం ఇస్తే మంచిది. 

నా కిష్టమైన ఒక పెద్ద హీరో ఇంకొకరి కాళ్ళు పట్టుకున్నట్లు కార్టూన్ వేసినా నేనంత బాధపడేవాణ్ణి కాదు ఎందుకంటే రీల్ లైఫ్ లో అతనొక హీరో అంతే తప్ప రియల్ లైఫ్ లో ప్రజలెన్నుకున్న బాధ్యతా పదవిలో లేరు కాబట్టి. 

ఆంధ్ర తరపున ఆయనొక representative, మన కుటుంబంలో ఒక పెద్ద మనిషి లాంటి వాడు అలాంటి హోదా గల వ్యక్తి ని ఇలా ఇంకొకరి కాళ్ళు పట్టుకున్నట్లు కార్టూన్ లో వేయడం నాకైతే నచ్చలేదు. ఆయనే చాలా సార్లు అని ఉంటారు నా కోసం మా పార్టీ కోసం పాటుపడుతున్న కార్యకర్తలకు శిరసు వంచి పాదాభివందనం చేస్తున్నాను అని.  ఆయనే అలా అన్నాడు కదా అని మొత్తం వాళ్ళ పార్టీ కార్యకర్తల కాళ్ళు పట్టుకున్నట్లు కార్టూన్ వేస్తే బాగోదు కదా. అంతెందుకు మీ కాలిలో ముళ్ళు గుచ్చుకుంటే నా నోటితో తీస్తా అని K.C.R గారు అన్నారు కదా అని అలాగే ఒక కార్టూన్ వేస్తే ఏం  బాగుంటుంది చెప్పండి. 

కార్టూన్ కదా సరదాకి తీసుకోవాలి అని ఎవరైనా నాకు సుద్దులు చెపితే నేనేమి చేయలేను. 

ఎవరు తప్పు చేసినా ఉతికి ఆరేసే బాధ్యత పత్రికలది ముఖ్య మంత్రి అయినా ప్రధాని అయినా దీనికి అతీతులు కాదు. పత్రికలూ ఉన్నదే ఎవరైనా తప్పులు చేస్తే ఎత్తి చూపి విమర్శలు గుప్పించడానికి, అంతే కానీ ఇలాంటి అడ్డగోలు కార్టూన్స్ వేయడానికి కాదని నా అభిప్రాయం.  బ్లాగ్స్ రాయడం లో బచ్చాని అయిన నాకు అనిపించిన మూడు ముక్కలు మీ ముందుంచాను తప్పైతే విజ్ఞులైన మీరు మన్నించాలి. 

నేను రాసే ఈ అల్లాటప్పా బ్లాగ్ లోనే ఏదైనా రాస్తే ఎవరినైనా కించపరిచినట్లు అవుతుందేమో అని ఒకటికి రెండు సార్లు ఆలోచిస్తాను అలాంటిది ఒక బాధ్యతాయుతమైన పత్రికా యాజమాన్యం ఇలాంటివి ఎలా అనుమతిస్తోందో మరి. 

P.S: నేను తెలుగు దేశం పార్టీ సపోర్టర్ నో లేక చంద్ర బాబు గారి అభిమానినో కాదు. ఒక వేళ జగన్ గారు సి.ఎం గా ఉండి ఆయన మీద ఇలా ఒక కార్టూన్ వేసినా కూడా నేను ఇలాగే రియాక్ట్ అయ్యేవాడిని. 






Sunday, 24 July 2016

దశాబ్దాలుగా మగజాతిని బాధిస్తున్న సీరియల్స్

అది 1999 వ సంవత్సరం

ఏం నాయనా లడ్డూ కావాలా అన్న పిలుపుతో దేవుడ్ని దీనంగా ప్రార్తిస్తున్న నేను కళ్ళు తెరిచి చూసాను

ఎదురుగా దేవుడు .. అచ్చంగా ఎన్టీవోడిలానే అందంగా ఉన్నాడు

అయ్యో లడ్డు కోసమైతే మిమ్మల్ని ఎందుకు అడుగుతాను స్వామీ.. మా అమ్మనే అడిగితే ఇచ్చేదిగా

మరెందుకు పిలిచావ్ నాయనా

ఆ ఋతురాగాలు సీరియల్ ఆపించెయ్ స్వామి. నేనెప్పుడో ఇంటర్ చదివే రోజుల్లో మొదలైంది నా డిగ్రీ కూడా పూర్తవుతోంది అయినా ఆ రాగాలు ఆగడం లేదు

నీకేంటి నాయనా అంత ఇబ్బంది దాని వల్ల

మా అమ్మ గత మూడేళ్ళుగా ప్రతి సాయంత్రం ఆ సీరియల్ ను క్రమం తప్పకుండా చూస్తోంది దాంతో క్రికెట్ ఉన్న రోజుల్లో అయితే ఆఖరి ఐదారు ఓవర్లు మిస్సవుతున్నాం స్వామీ. మా సిల్క్ స్మిత, దివ్య భారతి లను తొందరగా తీసుకెళ్లడమే కాకుండా శ్రీదేవిని ఇక్కడెవరూ దొరకనట్లు ఆడెవడికో రాసి పెట్టి (1996) మాకు చేసిన అన్యాయానికి ఇలా అయినా న్యాయం చెయ్యి స్వామీ

సరే చింతించకు నాయనా ఆ సీరియల్ ను ఆపించేస్తాను


అది 2008 వ సంవత్సరం


నిన్ననే కదా పిలిచావ్ మళ్ళీ ఏమొచ్చింది

నిన్న ఏమిటి స్వామి ఏళ్ళు గడిచిపోయాయి ఇక్కడ .. చక్రవాకం ఆపించెయ్ స్వామి

ఇలా ఎన్ని ఆపించేసినా ఇంకో సీరియల్ స్టార్ట్ అవుతూనే ఉంటుంది నాయనా

"జరిగేది జరగక మానదు నువ్వు చేయాల్సింది నువ్వు చెయ్" అని గీత లో ఘంటసాల గారు చెప్పినట్లు గుర్తు స్వామీ అందుకే ఇలా నా వల్ల అయినది నేను చేయాలనుకుంటున్నాను

కృష్ణుడు కదా నాయనా అలా అర్జునిడికి చెప్పింది

మాకైతే ఘంటసాల గారే చెప్పారండి కృష్ణుడు విని అదే అర్జునుడికి చెప్పి ఉండవచ్చు

నిన్ను మార్చడం ఎవరివల్ల కాదు

ఎందుకు మార్చారుగా ...

చాలు నాయనా మాట సరిదిద్దుకుంటాను .. మీ రమణ సారు వల్ల తప్ప నిన్ను మార్చడం ఇంకెవరి వల్ల కాదు.



అది 2013 వ సంవత్సరం

మళ్ళీ పిలిచావ్ ఏమైంది?

ఈ సారి మొగలిరేకులు స్వామీ

నువ్విప్పుడు బెంగళూరు లో ఉంటున్నావు మీ అమ్మ మీ ఊరిలో ఉంటోంది  ఇక ఆ సీరియల్ వల్ల ఇబ్బంది ఏమిటి నీకు?

అప్పుడెప్పుడో ఋతురాగాలు, చక్రవాకం టైం లో మా అమ్మ బారిన పడ్డాను ఇప్పుడు మొగలి రేకులు వల్ల మా ఆవిడ బారిన పడ్డానండి.

సరే అప్పుడంటే చిన్నవాడివి ఇప్పుడు పెద్దవాడివైపోయావు కదా ..  నీ ఫ్రెండ్స్ పబ్ కో క్లబ్ కో వెళ్తారు కదా వాళ్ళతో కలిసి నువ్వు వెళ్లి చావచ్చుగా నీ భార్య సీరియల్స్ చూసే టైం లో

తమలపాకులు నమిలితేనే తప్పు,  చదువు సరిగ్గా రాదు అని పెంచారు స్వామీ పెద్దవాళ్ళు అలాంటిది పబ్ కో క్లబ్ కో అంటే తప్పు కదా స్వామీ

రాజీవ్ గాంధీ కాలంలో పుట్టాల్సిన నిన్ను రాహుకాల గాంధీ సారీ రాహుల్ గాంధీ కాలం లో పుట్టించడం నా తప్పు

కదా..మరి మా ఫ్రెండ్స్ ఏంటి స్వామీ .. ఇందిరా గాంధీ కాలం లో పుట్టాల్సిన వాడినని అంటూ ఉంటారు

మీ ఫ్రెండ్స్ చెప్పిందే కరెక్ట్ అనుకుంటా నేనే రాంగ్ స్టేట్మెంట్ ఇచ్చినట్లు ఉన్నాను నీ గురించి

అదంతా వదిలేయండి స్వామీ కనీసం మా ఈ. వి .వి  సత్యనారాయణ ను తొందరగా తీసుకెళ్ళి (2011) మాకు చేసిన అన్యాయానికి ఇలా ఈ మొగలిరేకులు సీరియల్ ఆపించి అయినా న్యాయం చెయ్యచ్చుగా

అలా ఆ సీరియల్ కు ఫుల్ స్టాప్ పడింది.

సీరియల్ కష్టాలు ఇక్కడితో ఆగలేదు అవి సీరియల్ గా రాస్తేనే బాగుంటుందని ఇంకో భాగం కోసం అట్టే అట్టి పెట్టా.








Thursday, 21 July 2016

పులివెందుల నుంచి పులిలా తిరిగొచ్చాను.

ముందు రాసిన పిల్లిలా పులివెందుల వెళ్ళాను పోస్ట్ కి ఇది కొనసాగింపు.

ప్రతీ ఆదివారం పూట మా మెస్ లో బ్రేక్ ఫాస్ట్ గా పూరి పెడతారు. కాబట్టి రేప్పొద్దున ఆ పూరీ తినడం కోసమైనా ఏదో ఒక లాగా నేను బతకాలి.  ఈ ఒక్క ఆశ చాలు ఏదో ఒక ప్లాన్ ఆలోచించి దెయ్యం బారి నుంచి ఈ పూటకు తప్పించుకుంటే చాలు.

ఒక వేళ దెయ్యం నన్ను తినడానికి వస్తే ఆవు-పులి కథలోలాగా నేను కూడా పూరి తినేసి వచ్చి రేపు రాత్రి ఇక్కడే పడుకుంటాను అని మాట ఇచ్చేస్తే సరి.  ఆ మాట నిలబెట్టుకొని నా నిజాయితీని దెయ్యం మెచ్చేలా చేసుకొని ప్రాణాలు కాపాడుకోవచ్చు అని నిర్ణయించుకున్నాను.

ఇక భయం లేదు పడుకోవచ్చు దెయ్యం వచ్చి లేపితే అప్పుడు చూసుకుందాం అని పడుకున్నాను.

కాసేపటికి ... ఏం పూరీ అంటే అంత ఇష్టమా అని అడిగింది దెయ్యం నన్ను నిద్ర లేపి.

తనకెలా తెలిసిందో ఏమో నేను పూరి గురించి అనుకున్నది అని భయపడుతూనే "ఇష్టం కాదు ప్రాణం. మా క్లాస్ లో బాగుండేది కుమారి అయితే మా మెస్ లో బాగుండేది పూరి" అంతేకాదు  అసలు

ఆ పూరి ని తినని పళ్ళు
కుమారి ని చూడని కళ్ళు
దివ్యభారతి కలలోకి రాని రాత్రుళ్ళు
వర్షం వస్తే నీళ్లు కారని ఇలాంటి స్కూళ్ళు
పది కిక్కులు కొడితే కానీ స్టార్ట్ కాని వాళ్ళ నాన్నకున్న బజాజ్ లాంటి బళ్ళు
కడుపు నిండా ప్రసాదం పెట్టని గుళ్ళు
సంక్రాంతి ముగ్గుల్లో పువ్వులు పెట్టని గొబ్బిళ్ళు
గోరింటాకు లేని ఆడవాళ్ళ గోళ్ళు
కాళ్లకు సరిగ్గా సరిపోని జోళ్ళు
కండ పట్టని వొళ్ళు
అబద్దాలు చెప్పడం రాని మగాళ్ళు
షాపింగ్ అంటే ఇంట్రెస్ట్ లేని ఆడాళ్ళు
పిల్లికి కూడా భయపడే నా లాంటి వాళ్ళు

ఉన్నా ఒకటే లేకపోయినా ఒకటే అని మా రామ్మూర్తి ఫీలింగ్.

అసలా పూరి తినడం కోసం బ్రష్ చేసుకోకుండా ఒకసారి, బ్రష్ చేసుకొని మరో సారి, లాస్ట్ బ్యాచ్ లో ఇంకోసారి వెళ్ళేవాడిని. అసలు చిరంజీవి - రాధ, బాలకృష్ణ - విజయశాంతి కాంబినేషన్ ఎలాగో అలాగే పూరి విత్ బొంబాయి చట్నీ కాంబినేషన్ అదుర్స్. అందుకే ఆ పూరి అంటే ప్రాణం.

నువ్వు తెలుగు సినిమాలు ఎక్కువ చూసేట్లు ఉన్నావే .. నువ్వు నీ చెత్త డైలాగులు. సరే అయితే పూరి తినడం లో నాతో పోటీ పడు...నువ్వు గెలిస్తే వదిలేస్తాను అంది.

ఏదో మంత్రం వేసినట్లు పూరీలన్నీ నా ముందు ప్రత్యక్షం.

ఇక నేను దెయ్యం పోటీ పడి పూరీలు లాగించాము. కాసేపటికి ఇక నేను తినలేను అని దెయ్యం కాళ్లెత్తేసింది.(మనమైతే చేతులెత్తేసాము అంటాము కదా  అదే దెయ్యం అయితే కాళ్ళు ఎత్తేస్తుంది అని అనాలట అదే చెప్పింది నాతో..మీరు నమ్మాలి)

 నేను మాత్రం తింటూనే ఉన్నాను.

నువ్వేమైనా కుంభకర్ణుడికి కజిన్ బ్రదరా అని అడిగింది

భలే కనిపెట్టేసారే! నా గురించి తెలిసిన వాళ్ళందరూ అదే అంటారు నన్ను.  మీరు ఓడిపోయారు  కాబట్టి  ఇక నన్ను తినకూడదు అన్నాను కాస్త ధైర్యం కూడగట్టుకొని.

మీ మనుషులైనా మాట మీద నిలబడరేమో గాని మేము అలా కాదు మాట ఇచ్చామంటే ఆ మాట మీద కూర్చుంటాం.

మాట మీద కూర్చోవడమేమిటండి దెయ్యం గారూ ?

మీరు మాట మీద నిలబడతాం అంటారు కదా అదే మేమైతే మాట మీద కూర్చుంటాం అని అంటాము. అయినా పూరీలతోనే నా కడుపు నిండిపోయింది నిన్నేం తింటాను నీ తిండి యావ చూస్తే నువ్వే నన్ను తినేట్లు ఉన్నావ్... నే వెళ్తున్న పిన్నోయ్ అంది దెయ్యం ( మనం బాబోయ్ అన్నట్లు దెయ్యాలు పిన్నోయ్ అంటాయి నేను అర్థం చేసుకున్నట్లే మీరూ అర్థం చేసుకోవాలి )

పవన్ పవన్ అనే  పిలుపు వినపడింది.

వెళ్తానన్నారు ఇంకా వెళ్లలేదా అన్నాను అది నిర్ణయం మార్చుకుందేమో అన్న భయంతో.

నేను రామ్మూర్తిని... కళ్ళు తెరిచి చూడు అన్న మాట వినిపించింది

నేను కళ్ళు తెరిచి చూద్దును కదా తెల్లవారినట్లు ఉంది.  మా రామ్మూర్తి తో పాటు హాస్టల్ వార్డెన్ ఉన్నారక్కడ. అప్పుడర్థమైంది  దెయ్యం వచ్చింది కలలోకి అని.

అలా ఆ రాత్రి  ఒంటరిగా చీకటి రూం లో గడిచి పోయింది అలాగే నా భయం ఎటో ఎగిరి పోయింది. రాత్రంతా ఒంటరిగా చీకట్లో ఉన్నాను అయినా ఏమి కాలేదు కాబట్టి ఈ భయాలు గట్రా ఒట్టి ట్రాష్ అని అర్థం చేసుకున్నాను. 

పిల్లి లాంటి నన్ను పులిలా తయారుచేసింది ఆ సంఘటన. ఆ రోజుతో ఒక్క చీకటంటేనే కాదు చాలా భయాలు పరారీ. నిజ్జంగా ఇది నిజం ఆ దెయ్యం మీదొట్టు మీరు నమ్మాలి. దెయ్యాలు గియ్యాల్లాంటి భయాలు ఇప్పుడు అస్సలు లేవు.



వామ్మో గమనించనేలేదు అర్ధరాత్రవుతోంది .. ఏ దెయ్యమో వచ్చి నన్ను తినెయ్యదు కదా .. వెంటనే ముసుగేసుకుని పడుకోవాలి.  ఈ దిండు కింద హనుమాన్ చాలీసా ఉండాలి..  ఏది ఎక్కడ కనపడదే....మా చంటోడికి ఇప్పుడిప్పుడే పళ్ళు వస్తున్నాయి ఏది దొరికితే అది నోట్లో పెట్టుకొని కసా బిసా నమిలేస్తున్నాడు.. ఈ హనుమాన్ చాలీసా కూడా అలాగే నమిలెయ్యలేదు కదా..  అదెక్కడుందో వెతుక్కోవాలి ... బతికుంటే మళ్ళీ ఇంకో బ్లాగ్ తో కలుస్తాను

Monday, 18 July 2016

పిల్లిలా పులివెందుల వెళ్ళాను.

చిన్నప్పుడు విపరీతమైన భయం నాకు. ప్రతి దానికి భయపడేవాడిని. అంటే ఇప్పుడు భయాలు లేవని కాదు. ఇప్పటికీ ఉన్నాయి.

ఈ రోజు సోమవారం కదా ఆఫీస్ కు వెళ్లాలని భయం. అప్పుడు స్కూల్ కి వెళ్లాలని ఇప్పుడు ఆఫీస్ కి వెళ్లాలని అంతే తేడా.

ప్రసాదం కోసం గుళ్లో క్యూ లో నుల్చున్నప్పుడు నా వంతు వచ్చేసరికి అది అయిపోతుందని భయం.

చిరంజీవి సినిమా ప్లాప్ అయినప్పుడల్లా మా కళాధర్ గాడు నన్ను బండబూతులు తిట్టుకుంటాడని భయం. దీని గురించి ఇంకో పోస్ట్ లో మాట్లాడుకుందాం.

నేను మ్యాచ్ చూసినప్పుడల్లా సచిన్ సరిగ్గా ఆడకుండానే ఔట్ అవుతాడని చుట్టూ ఉన్న అందరూ నేను మ్యాచ్ చూసినందుకే అలా అయిందని తిడతారని భయం.

మా అమ్మ నన్ను సినిమాకు తీసుకెళతానంటే భయం. పుట్టింటి పట్టుచీర, కలికాలం, సంసారం ఒక చదరంగం లాంటి ఫైటింగ్స్ లేని ఏడుపుగొట్టు సినిమాలకు తీసుకెళ్తుందని.

నాన్న వెనుక బైక్ మీద కూర్చున్నప్పుడు ఏదన్నా వెహికిల్ క్రాస్ చేసి వెళ్ళినప్పుడు వచ్చే ఆ సౌండ్ కు ఉలిక్కిపడేంత భయం.  

సినిమాల్లో హీరో ఫైట్ చేస్తున్నప్పుడు వర్షం పడిందంటే ఆ హీరోను వెనుక నుంచి ఎవరో ఒకరు పొడిచేస్తారు అనే ఒక భయం ఉండేది..కాబట్టి భయపడి ఆ ఫైట్ అయ్యేదాకా కళ్ళు మూసుకునే వాడిని.

ఎవరైనా స్కూల్ లో పిల్లలు కొడితే భయంతో తిరిగి వాళ్ళను ఏమి అనలేక ఏడ్చుకుంటూ ఇంటికి వచ్చేవాడిని. ఆ తర్వాత మా చెల్లెలు వెళ్లి వాళ్ళను ఒక దుమ్ము దులిపి వచ్చేది అది వేరే విషయం.

పులివెందులకు చదువుకోవడానికి వెళ్లే ముందు, అక్కడ చదువుకుంటున్నప్పుడు కూడా ఇలా ఎన్నో భయాలతో పిరికి వాడిలా  పిల్లిలా ప్రతీ దానికి భయపడేవాణ్ణి ఆఖరికి పిల్లికి కూడా.

అలాగే చీకటంటే మాత్రం చిన్నప్పుడు చాలా భయం. దాని గురించే ఈ పోస్ట్.

పులివెందుల లో చదివేప్పుడు సంవత్సరం అంతా గడిచి  ఏడవ తరగతి పరీక్షలు దగ్గర పడ్డాయి. అందుకోసం నైట్ స్టడీస్ అని చెప్పి స్కూల్లో ఆరుబయట లైట్స్ కింద కూర్చోబెట్టి సాయంకాలం ఏడు నుంచి రాత్రి పది దాకా చదివించేవారు. 

ఒక రోజు నైట్ స్టడీ లో చదివి చదివి బ్రెయిన్ హీట్ ఎక్కి అరికాలు నొప్పి గా ఉందని మా టీచర్ కి చెప్తే సరే హాస్టల్ రూం కి వెళ్లి పడుకో అన్నాడు. 

మరి హాస్టల్ రూం ఏమో కొంచెం దూరం .. ఒక్కడిని వెళ్లాలంటే భయం అందుకని నైట్ స్టడీ ఇంకా రెండు గంటల సేపు ఉంది కదా ఈ లోపు లేయొచ్చులే అనే ఓవర్ కాన్ఫిడెన్స్ తో (నేను పడుకుంటే కుంభకర్ణుడికి కజిన్ బ్రదర్ ని అని తెలిసీ) పక్కనే ఉన్న క్లాస్ రూం లోకి వెళ్లి పడుకున్నాను.

నక్క అరుపులకో మరి కుక్క అరుపులకో కాసేపటికి అంటే ఒక నాలుగైదు గంటల తర్వాత అనుకుంటాను మెలకువ వచ్చింది ..చుట్టూ చీకటి అసలేమీ కనపడి చావలేదు .. "రామ్మూర్తీ" అని పిలిచాను. వాడే ఎక్కువగా నా పక్కన పడుకునేవాడు హాస్టల్ లో.  నా సౌండ్ నాకే రీసౌండ్ లా వినపడింది కానీ రెస్పాన్స్ లేదు.

అప్పటికి గానీ బుర్రలో లైట్ వెలిగి నేనెక్కడ పడుకున్నానో గుర్తు రాలేదు. క్లాస్ రూం లో లైట్ వెలిగిద్దామనుకున్నాను కానీ స్విచ్ రూం బయట ఉందనే విషయం గుర్తొచ్చింది. 

రూం బయట ఉన్న టాప్ ఎవడో సరిగా ఆఫ్ చేసినట్లు లేడు. టాప్ లోంచి నీళ్లు కింద పడ్డప్పుడల్లా టప్ టప్ అని వచ్చే శబ్దం నా భయాన్ని రెట్టింపు చేస్తోంది.

ఆ మధ్యే రక్త జ్వాల అనే దిక్కుమాలిన దెయ్యం సినిమా చూసాను సారీ విన్నాను. (మళ్ళీ మా రామ్మూర్తి ఏదో ఒకటి అంటాడు నేను హారర్ సినిమా చూసాను అంటే ). ఆ సినిమా లో కట్ అయిన ఒక చెయ్యి వచ్చి అందరిని చంపేస్తూ ఉంటుంది అది కాస్త దారి తప్పి ఇక్కడికి వస్తుందేమో అని భయం. 

ఆ చెయ్యి కాకపోయినా ఖచ్చితంగా యే దెయ్యమో ఈ చీకట్లో వచ్చి నన్ను బ్రేక్ ఫాస్ట్/లంచ్/డిన్నర్ గానో తినేస్తుంది అని అనుకున్నాను. దెయ్యాల తిండి అని అంటూ ఉంటారు కదా అది నేను ఇవాళ ప్రత్యక్షంగా చూస్తూ చచ్చిపోతానేమో అనుకున్నాను. 

నిన్న వేసుకున్న పాంట్ జేబులో నాలుగు న్యూట్రిన్ చాక్లేట్లు అలాగే ఉండిపోయాయి. ఆ గోపి గాడు రెండు నెలల కింద నా దగ్గర తీసుకున్న రెండు నిమ్మొప్పుల బాకీ  అలాగే ఉండిపోయింది. మ్యాథ్స్ బుక్ లో ఉండే నెమలి ఈకను ఆ కిషోర్ గాడు ఎప్పుడూ అడుగుతూ ఉండేవాడు వాడికి ఇచ్చినా బాగుండేది మంచి వాడిగా అన్నా మిగిలి పోయేవాడిని వాడి దృష్టిలో.  ఇంటి దగ్గర ఆడిన గోళీల ఆటలలో గెలిచి నేను సంపాదించుకున్న బుట్టెడు గోళీలు, రెండు బొంగరాలు గూట్లో అలాగే ఉండిపోయాయి. ఈ నెల చందమామ ఇంకా చదవనే లేదు. ఇక అన్నిటి కన్నా ముఖ్యమైన నా ఆస్థి  ట్రంక్ పెట్టెలో అడుగున  ఉండే మూడు దివ్య భారతి పేపర్ కట్టింగ్ లు, రెండు సిల్క్ స్మిత పేపర్ కట్టింగ్ లు. నేను పోతే అవి ఎవడు సొంతం చేసుకుంటాడో అనే బెంగ ఒక వైపు. 

ఇక నా ప్రాణాలు అప్పుడో ఇప్పుడో పోతాయనే అనుకున్నాను. సరిగ్గా అప్పుడు గుర్తొచ్చింది ఆ రోజు శని వారం రాత్రి అని తెల్లారితే ఆదివారం అని.

పోస్ట్ పెద్దదవుతోంది కాబట్టి మిగిలినది తరువాతి పోస్ట్ లో రాస్తాను. 




Wednesday, 13 July 2016

కాష్మోరా లో లాగా చేతబడి చేస్తే


పులివెందులలో చదివే రోజుల్లో హాస్టల్ లో రెండు వారాలకోసారి సినిమా వేసేవారు.

ఒకసారి నారి నారి నడుమ మురారి వేశారు. బాలకృష్ణ సినిమా కదా ఫైటింగులు బాగానే ఉంటాయి అనుకున్నాము.

సినిమా చూస్తే నీరసం వచ్చేసింది ఒక్క ఫైటింగ్ కూడా లేదు దాంట్లో.

ఆ తర్వాత మరో రెండు వారాలకి అల్లుడుగారు సినిమా వేశారు.

మళ్ళీ నీరసం వచ్చేసింది ఆ సినిమాలోనూ ఒక్క ఫైటింగ్ లేదు.

అసలు ఇలాంటి ఫైటింగ్ లేని సినిమాలే కదా దూరదర్శన్ లో వేసేది...ఇక్కడ కూడా అవేనా అని కోపమొచ్చింది.

ఎవరైనా సినిమా చూసి వచ్చామని చెబితే ఎన్ని ఫైట్స్ ఉన్నాయి అని అడిగేవాళ్ళము అంత ఇష్టం ఫైటింగ్ సినిమాలంటే. అసలు ఫైటింగ్ లేని సినిమాలు సినిమాలే కాదని అనుకునే వయసు అది.

ఇలాంటి సినిమాలు వేస్తున్నందుకు స్కూల్ మానేజ్మెంట్  మీద అంటే రెడ్డి గారి మీద కోపం వచ్చింది. నేను మా రామ్మూర్తి కలిసి విప్లవ శంఖం పూరించి మా డిమాండ్స్ ను ఆయన ముందు ఉంచాము.
  1. నారి నారి నడుమ మురారి, అల్లుడుగారు లాంటి ఫైటింగులు లేని చెత్త సినిమాలు (అవే మంచి సినిమాలు అని తర్వాత అర్థమైంది) ఇకపైన వేయకూడదు. ధర్మక్షేత్రం, అసెంబ్లీ రౌడీ లాంటి సినిమాలు వేయాలి. (గమనిక: మోహన్ బాబు మీదో బాలకృష్ణ మీదో మాకెలాంటి ప్రేమ లేదు ఉన్నదంతా దివ్య భారతి మీదనే )
  2. మంచి సినిమాలు వేసినప్పుడు(వీటిలో చాలా వరకు చెత్త సినిమాలు అని తర్వాత అర్థం అయింది) సిల్క్ స్మిత పాట కట్ చేయడం లాంటివి చేయకూడదు. 
  3. రెండు వారాల కొకసారి కాకుండా ప్రతి వారం వీలైతే ప్రతి రోజూ సినిమా వేయడం 

ఆ తర్వాత ఎం జరిగి ఉంటుందో మీ ఊహకే వదిలేస్తున్నాను.

నేను, రామ్మూర్తి రహస్య సమావేశం ఏర్పాటు చేసుకున్నాము.

మామూలుగా చెబితే ఈయన వినే రకం కాదు. ఏదో ఒకటి చేయాలి.

మన డిమాండ్స్ ఒప్పుకోవాలంటే ఆయన కొడుకుని కిడ్నాప్ చేస్తే సరి అన్నాను...అదేదో సినిమాలో రావు గోపాల్ రావు చేసిన పనిని గుర్తుకు తెచ్చుకొని.

వాడు ఉండేది అమెరికా లో అట. 

అయితేనేం  మొన్ననేను బెంగళూరుకే  వెళ్ళొచ్చాడు అమెరికా వెళ్ళి రాలేనా

నా ఖర్మ .. నీ లాంటివాడితో ఫ్రెండ్షిప్ చేయడం

సరే సరే .. మొన్న మీ బాబాయి వచ్చి బయటికి తీసుకెళ్లినప్పుడు మనిద్దరం కాష్మోరా సినిమా చూసాము కదా  ఆ సినిమా లో లాగా చేతబడి చేస్తే

చూసాము అనొద్దు. నువ్వు చూసావు నేను విన్నాను అని చెప్పు.

అదేంట్రా అలా అంటావ్

నీ బొంద.. ప్రతి దానికి భయం అంటావ్.. కళ్ళు మూసుకుంటావ్.. సినిమా అంతా కళ్ళు మూసుకునే ఉన్నావ్ గా ఎక్కడ చూసి చచ్చావ్ వినడం తప్ప.

సరేలే ఆ సినిమా లో లాగా చేతబడి చేస్తే

నిమ్మప్పులు కొనడానికే డబ్బులు లేవిక్కడ..ఇక ఆ నిమ్మకాయలు, ముగ్గులు, మంత్రగాడిని ఎక్కడి నుంచి తెస్తాం.

అన్నిటికీ అన్నీ చెప్తావ్ .. నువ్వేదైనా సలహా ఇవ్వొచ్చుగా.

అంత తెలివే ఉంటే నీతో ఫ్రెండ్షిప్ ఎందుకు చేస్తాను?

అలా సరైన ఆలోచనలు లేక/రాక మా డిమాండ్ లను మేము నెరవేర్చుకోలేక పోయాము.





Saturday, 9 July 2016

రిజర్వేషన్ గోల

అవి బాగా బతికున్న రోజులు అంటే I.T ఫీల్డ్ లో కాకుండా స్కూల్ లో ఉన్నరోజులు.

ఛ ఈ రిజర్వేషన్ లతో పెద్ద చావొచ్చి పడిందిరా అన్నాడు మా రమేష్

అవునురా నిజమే నేను ఇబ్బంది పడ్డాను ఈ రిజర్వేషన్ తో

సరే పద దీని మీద ధర్నా చేస్తున్నారు మనమూ వెళ్లి సపోర్ట్ చేద్దాం అంటూ కదిలాడు

అటు వైపేందుకు రైల్వే స్టేషన్ వైపు వెళ్ళకుండా ఓహ్..భాషా బజ్జీ ల షాప్ దగ్గరికా .. రెండు పొట్లాలు ఎక్కువే తీసుకెళదాం తింటానికి పనికొస్తాయి ధర్నా మధ్యలో

ఎప్పుడూ తిండి గోలేనా

తిండి కలిగితే కండ కలదోయ్  కండ కలవాడే మనిషోయ్ అన్నారుగా గురజాడ

ఇలాంటివి మాత్రం భలే గుర్తుపెట్టుకుంటావ్ సమర్థించుకోవడానికి

మరి అటు వైపెందుకు వెళ్తున్నావ్ రైల్వే స్టేషన్ ఇటు వైపు ఉంటే

మాటి మాటికీ రైల్వే స్టేషన్ అంటావ్ అక్కడేం పనిరా

ధర్నా చేస్తుండేది అక్కడ కాదా మరి

అక్కడెందుకు చేస్తారు .. కలక్టరేట్ దగ్గర చేస్తున్నారు

రైల్వే స్టేషన్ దగ్గర కాకుండా అక్కడెందుకు చేస్తున్నారు

నీ రైల్వే స్టేషన్ గొడవేమిట్రా

మొన్న మేము తిరుపతి కి ట్రైన్ లో వెళ్ళినప్పుడు రిజర్వేషన్ చేసుకోలేదు అందుకే ఇబ్బంది పడ్డాము . ఈ రైల్వే లో రిజర్వేషన్  తీసేస్తే ఏ బాధా ఉండదు కదా అందుకే ఆ ధర్నా రైల్వే స్టేషన్ దగ్గర చేస్తున్నారేమో అందుకే అటు వెళదాం అన్నాను

ఏడ్చినట్లే ఉంది నీ తెలివి .. నేను మాట్లాడేది క్యాస్ట్ రిజర్వేషన్  ల గురించి

అదేం రిజర్వేషన్ ?

లోక జ్ఞానం లేదురా  నీకు

లోకా వాళ్ళ గురించి నాకెందుకు తెలీదు ఆ రెడ్డి వాళ్ళుండేది మా వీధిలోనే వాళ్ళఅమ్మాయి గురించి వాళ్ళ అమ్మ నాన్న కన్నా నాకే ఎక్కువ తెలుసు. అంతే కాదు వాళ్ళింట్లో ఉండే ప్రతి ఫ్యాక్షనిస్ట్ లు, ఫెమినిస్టులు కూడా తెలుసు నాకు.

ఫ్యాక్షనిస్ట్ లు సరే ఫెమినిస్టులు వాళ్ళింట్లో ఉండటమేమిట్రా ?

అన్నీ తెలుసంటావ్ ఫెమినిస్టులు తెలీదా

తెలుసు గానీ వాళ్ళింట్లో ఫెమినిస్టులు ఏమిటి అని

వాళ్ళది ఫ్యాక్షన్ ఫ్యామిలీ కదా మగవాళ్ళనైతే ఫ్యాక్షనిస్ట్ లు అంటారు అదే ఆడాళ్ళనైతే ఫెమినిస్టులు అంటారు ఆ మాత్రం తెలీకపోతే ఎలారా

ఖర్మ నిన్ను మార్చడం ఎవరి వల్లా కాదు

ఎందుకు కాదు .. రమణ సారు మార్చాడుగా నన్ను ..  ఏడో తరగతి నుంచి ఐదవ తరగతికి  

Thursday, 7 July 2016

జూన్ నెల కబుర్లు

వరుసగా ఏడేళ్ళు జాగ్రత్తగా దాచి ఉంచిన వస్తువుని  పారేసిన మర్నాడే దాని అవసరం ఉంటుంది అని పెద్దలు చెప్పినట్లు ఇక పాత మిక్సీ అవసరం లేదు ఇంట్లో Place waste అని పారేసిన పది రోజుల్లోనే కొత్తది రిపేర్ కు వచ్చింది. 

దరిద్రుడి పెళ్లికి వడగళ్ల వాన అన్నట్లు మొన్న అర్జెంట్ గా రూపీస్ అవసరపడి ఇక్కడి నుంచి ఇండియా కు ట్రాన్స్ఫర్ చేసుకుందామనుకునే లోపు యూ.కె యూరోపియన్ యూనియన్ నుంచి విడిపోయింది. దాని effect తో ఆస్ట్రేలియాన్ డాలర్ రేట్ లో బాగా తేడా వచ్చి 49.05 రేట్ తో పంపించాల్సి వచ్చింది.

ఇక్కడ వీకెండ్ ఎలెక్షన్స్ జరిగాయి.  ఎవరికి ఓట్ వేస్తున్నావ్ అని నా  మిత్రుడ్నిముందు రోజు అడిగితే ఇంకా decide చేసుకోలేదు అన్నాడు.ఆ మాత్రం క్లారిటీ లేకుండా ఎలా ఉంటారో అర్థం కాదు నాకు. నీకిష్టమైన స్వీట్ ఏది అని నన్ను అడిగితే 'జిలేబి, కజ్జి కాయలు, అప్పచ్చులు, బెల్లం మిఠాయి, పీచు మిఠాయి, పూత రేకులు, బాదుషా, బర్ఫీ, లడ్డు, చక్కెర పొంగళి, పాకం పప్పు, హల్వా, బెల్లం పాయసం, గులాబ్ జాము, మైసూర్ పాకు, పాల కోవా, గవ్వలు, తీపి గారెలు, కాజాలు, బొబ్బట్లు, జీళ్ళు, జాంగ్రీ, కేకు, నువ్వుల ఉండ, పూర్ణం బూరెలు' అని చెప్పగలను. అంత క్లారిటీ ఉంటుంది  నా వరకు నాకైతే.

ఈ మధ్య ఇలియానా చాలీ చాలని బట్టలు వేసుకుంటూ మళ్ళీ తెలుగు సినిమా న్యూస్ లో కనపడుతుందే అంది నా భార్య. 

తెలుగు సినిమాల్లో చోటిస్తారనేమో అన్నాను. 

వాళ్ళు ఇచ్చినా ఇవ్వకపోయినా కనీసం నువ్వన్నా నీ బ్లాగ్ లో చోటివ్వచ్చుగా అంది.


స్కూల్లలో "మాతృభాష భోధన" అని  సిడ్నీ లో జరిగిన ఒక సభ గురించి ఇక్కడొక వీక్లి లో కొన్ని ఫోటోలు వేశారు. ఒక్క తెలుగు తప్ప తమిళ్, కన్నడ, మలయాళం లాంటి భాషలన్నీ ఉన్న ఒక పోస్టర్ వేశారు ఆ స్టేజ్ మీద. కనీసం తెలుగు తరపున  ఆ సభలో ఎవరన్నా ఉన్నారో లేదో తెలీదు మరి. ఉన్నా పట్టించుకోలేదేమో. ఇలాగే పోతే ఇంకొన్ని సంవత్సరాలకు తెలుగు లో మాట్లాడేవాడిని పిచ్చివాడి కింద జమకడ్తారేమో.

బిచ్చగాడు సినిమా సాధించిన విజయాన్ని క్యాష్ చేసుకుందామని "ముష్టివాడు" అనే టైటిల్ తో సినిమా తీసేసి క్రేజ్ కొట్టేద్దామని అనుకుంటే ఆల్రెడీ ఎవరో ఆ పేరుతో రిజిస్టర్ చేసేశారని తెలిసి  "వీర ముష్టివాడు" అని టైటిల్ మార్చి 'వీడో మిలియనీర్' అనే  టాగ్ లైన్ తో సినిమా పేరు రిజిస్టర్ చేసుకున్నాను. జూన్ 31 వ తేదీన ఆడిషన్స్ ఏర్పాటు చేసాను. ఎందుకో మరి ఎవరూ రాలేదు ఆ రోజు తో సహా. ఇప్పటికీ మించిపోలేదు ఎవరికైనా ఇంట్రస్ట్ ఉంటే ఫోన్ నంబర్ $#$$@#$%#$% ను కాంటాక్ట్ అవ్వచ్చు. 




Tuesday, 5 July 2016

మసీదు మెట్ల మీద కూర్చుని అడుక్కుతింటావురోయ్

నేను తొమ్మిదవ తరగతి చదివేటప్పుడు భాషా అని ఒక మాథ్స్ టీచర్ ఉండేవారు. ఎవరైనా పిల్లాడు బాగా చదువుకోకపోతే వాడు చెడిపోతాడేమో అనే బాధతో 'మసీదు మెట్ల మీద కూర్చుని అడుక్కుతింటావురోయ్' అనే మాట ఆయన నోటి వెంట వచ్చేది .అలా ఎక్కువ సార్లు అనిపించుకున్న వాళ్ళలో లక్ష్మిపతి, చాంద్, కిరణ్ అనే ముగ్గురు మిత్రులు ఉండేవారు. 

వీళ్ళతో పాటు హుస్సేన్ అని ఇంకో మిత్రుడు కూడా ఉండేవాడు. అంతవరకూ హిందీ అంటే పెద్దగా తెలీని నేను అంతో ఇంతో నేర్చుకున్ననంటే అది మా హుస్సేన్ వల్లనే. హిందీ సినిమాలు చూడటం వలన కూడా హిందీ నేర్చుకోవచ్చు అని నన్ను మభ్యపెట్టి తనతో పాటు నన్ను కొన్ని హిందీ సినిమాలకు తీసుకెళ్ళేవాడు. సినిమాలు అర్థం కావడానికి భాష తెలియవలసిన అవసరం లేదన్న సత్యం బోధపడింది అంతేకాదు అంతవరకూ బావి లో కప్పలాగా చిరంజీవే ఇండియా లో పెద్ద స్టార్ అనుకునే నాకు అమితాబ్ అని ఇంకో పెద్ద స్టార్ కూడా ఉన్నాడని తెలిసింది.

ఎప్పుడు చూడు ఆ కట్టె పట్టుకొని పుల్లలు పెట్టుకుని ఆటలాడటం (క్రికెట్ ను ఆయన అలా అనేవారు) తప్ప ఏనాడైనా పుస్తకం పడితే కదరా చదువు బుర్రకేక్కేది అని పరీక్షల్లో తక్కువ మార్కులు వచ్చినప్పుడు బడిత పూజ చేసేవాడు మా బాషా సారు. బయట ఒక చిన్న బాబాయ్ హోటల్ లాంటిది ఉండేది. ఈ రోజు దెబ్బ ఎలా ఉందిరా అబ్బాయ్ అంటే నిన్నటి దెబ్బే బాగుంది బాబాయ్ అనేవాడు మా తోలు మందం చాంద్ గాడు . నిన్ను కొట్టి కొట్టి మీ సారు చేతులు పడిపోవాలే కాని నువ్వు మారవు రా అబ్బాయ్ అనేవాడు ఆ హోటల్ బాబాయ్.

హుస్సేన్ చదువులో  చురుకైన వాడే కానీ లక్ష్మిపతి, చాంద్ మాత్రం బాగా వీక్.  1 కిలో పంచదార 12 రూపాయిలైతే 3 కిలోలు ఎంత లాంటి చిన్న లెక్కలడిగినా చాలు చెమటతో వాళ్ళ చొక్కాలు తడిచిపోయేవి. ఒరేయ్ లక్ష్మిపతి కనీసం ఈ లెక్క కూడా చెప్పలేకపోతే మీ నాన్న కిరాణా షాప్ ఎలా నడపగాలవురా అని అనేవారు మా భాషా సార్. కానీ లక్ష్మిపతి  మాత్రం calculator యూజ్ చేస్తే పోలా అని స్మార్ట్ గా ఆలోచించేవాడు. బతక నేర్చినవాడి ఆలోచన అది అని కొందరు అనేవారు. 

ఆ లెక్క నువ్వు చెప్పురా చాంద్ అంటే చాలు వాడి నోరు బంద్.

ఎందుకు ఏడుస్తున్నావ్ అంటే మొగుడు కొట్టబోయే దెబ్బలకి అందట వెనకటికి ఒకావిడ అలా సారు ఈ ప్రశ్న అడగ్గానే మా కిరణ్ ఏడుపు మొదలెట్టేవాడు.  

ఇలా సంవత్సరమంతా వాళ్లకు లెక్కలు నేర్పించాలనుకున్నా వాళ్లకు ఎక్కలేదు.  విసుగొచ్చేసి నాశనం అయిపోతారురా రేయ్ మసీదు మెట్ల మీద కూర్చుని అడుక్కుతింటారు. ఒరేయ్ లక్ష్మిపతి నువ్వేమో  బడి మానేసి ఆ కిరాణా కొట్లో కూర్చోవాల్సిందే, చాంద్ నువ్వేమో మీ నాన్న బదులు నువ్వు సైకిల్ కు puncture వేసుకు బతకాలి. రేయ్ కిరణ్ నువ్వేమో మీ నాన్న లాగానే సోడాలమ్ముకొని బతకాలి అని తిట్టేసాడు.

కాని విధి విచిత్రమేమిటంటే లక్ష్మిపతి సూపర్ మార్కెట్ పెట్టుకొని బాగా సంపాదించి బాగా బతికేస్తున్నాడు. బద్దకానికి బ్రాండ్ అంబాసిడర్ లాంటి చాంద్ అయితే వాళ్ళ నాన్నతో పెట్టుబడి పెట్టించి మొబైల్ షో రూం పెట్టుకొని బ్రహ్మాండంగా బతుకుతున్నాడు. ఇక కిరణ్ ఏమో కష్టపడి సోడా కొట్టు ను ఐస్ క్రీం parlour గా మార్చేసి కూల్ డ్రింక్స్, ఐస్ క్రీం లు  అమ్ముకుంటూ దర్జాగా బతుకుతున్నాడు

ఇక బాగా చదువుకున్న హుస్సేన్, నేను I.T ఫీల్డ్ లో సాఫ్ట్ వేర్ ఇంజనీర్ లుగా తెల్లోల్లకు బానిసత్వం చేస్తున్నాము.

ముష్టోడికి ఒక ఇల్లని లేదు అలాగే ఉద్యోగికి ఒక ఊరని లేదు అంటారు కదా అలా మా నాన్నకు ట్రాన్స్ఫర్ అయి ఊరు మారాల్సి వచ్చినప్పుల్లా పాత ఫ్రెండ్స్ ని వదిలేసి కొత్త ఫ్రండ్స్ ని వెదుక్కోవలసి వచ్చేది. కాని ఈ నలుగురు ఫ్రెండ్స్ మాత్రం బాగా స్పెషల్, ఎందుకంటే అప్పుడే కొన్న కొత్త సైకిల్స్ మీద విపరీతంగా తిరగడం, చింత చెట్లు ఎక్కి చింతకాయలు కోయడం, క్రికెట్ ఆడటం లాంటివి తప్ప ఏనాడూ పెద్దగా చదివినట్లు గుర్తు లేదు. 

రంజాన్ కదా నా ఫ్రెండ్స్ హుస్సేన్, చాంద్, మా భాషా సర్ గుర్తొచ్చారు. 

ముస్లిం మిత్రులందరికీ రంజాన్ శుభాకాంక్షలు. 


Sunday, 3 July 2016

మూడవ కప్పదాటు

ముందటి టపాకి  కొనసాగింపు

గమనిక: కొన్ని సెన్సార్ అభ్యంతరాల వల్ల ఈ టపా కు యు/ఏ సర్టిఫికెట్ ఇవ్వడమైనది

ఇక ఆ తర్వాత మేముండే ఊరికి ఎప్పుడు చిరంజీవి సినిమా వచ్చినా వదలకుండా చూసేవాళ్ళము. అలాంటి టైంలోనే ఖైదీ సినిమా రిలీజ్ అయి ఇక చిరంజీవి గాడికి తిరుగులేదు అని అందరూ అనటం మొదలు పెట్టారు. ఖైదీ సినిమా మా ఊర్లో వేస్తున్నాము అని ఊరించి ఊరించి చివరికి రోషగాడు సినిమా తెచ్చారు ఒక రోజు.

షరా మామూలుగానే నేను నా ఫ్రెండ్ సినిమా మధ్యలో తినడానికి కావలసిన బజ్జీలు, జంతికలు, బెల్లం మిఠాయి, పాకం పప్పు లాంటివి శెట్టి గారి షాప్ లో కొనుక్కెళ్ళాము కానీ సినిమా స్టార్ట్ అవ్వకముందే సగం పైనే ఖాళీ చేసేసాము, మిగిలిన ఆ సగం భాగాన్ని సినిమా అయిపోయాక ఇంటికి పోయేప్పుడు తింటూ వెళదాం అని పక్కనపెట్టుకోకుండా ముందు జాగ్రత్తగా నీ భాగం నీ దగ్గర ఉంచుకో నా భాగం నా దగ్గర పెట్టుకుంటాను అని చెప్పాను పోయినసారి లాగా అన్యాయం కాకూడదని. అబ్బే ఈ సినిమాలో జయమాలిని లేదట కాబట్టి ఈ సారి అలా జరగదులే అన్నాడు.

సినిమా అయిపోయాక ఇంటికి వెళ్తూ ఇందాక తినకుండా మిగిలినవి కొన్ని ఉన్నాయి కదా ఇవ్వు తింటూ వెళదాం అని అడిగాను.

ఇంకెక్కడున్నాయ్ ఎప్పుడో తినేసాను అన్నాడు

ఎప్పుడు అని అడిగాను

ఎప్పుడేంటి చాలా సార్లు సినిమా మధ్యలో ఆ యమ్మి కనపడ్డప్పుడల్లా నీ నోట్లో దోమలు దూరినప్పుడు అన్నాడు.

మరుసటి రోజు మా వాడన్నట్లు నేను నోరు తెరిచి మరీ చూసిన ఆ యమ్మి ఎవరా అని ఈ సారి మా అమ్మ దగ్గర కాదు కానీ బళ్ళో కూపీ లాగాను . ఆ యమ్మి ఎవరో కాదు విజయలక్ష్మి ఉరఫ్ సిల్క్ స్మిత అని తెలియడంతో పాటు నా కంటే పెద్ద ముదుర్లు మా క్లాస్ లో ఉన్నారని కూడా తెలిసింది.

LOVE AT FIRST SIGHT లాగా సిల్క్ స్మిత మీద LIKE AT FIRST SIGHT ఏర్పడింది. వీడెంటి తేడా గాడు హీరోయిన్ మీద అభిమానం ఉండచ్చు కానీ వ్యాంపు మీద ఏమిటీ అని మీలో కొందరు అనుకుంటున్నట్లే మా బడదల్ కూడా అన్నాడు.

అప్పుడెప్పుడో వేటగాడు సినిమా చూసి శ్రీదేవి మీద అభిమానం పెంచుకున్నావ్ బాగానే ఉంది కానీ మరీ సిల్క్ స్మిత మీద ఏమిటి అన్నాడు.

నీకు పూరి ఇష్టమా చపాతి ఇష్టమా అడిగాను నేను

రెండూ అన్నాడు

మరి నాకు కూడా ఇద్దరూ ఇష్టమే అన్నాను

దానికి దీనికి పోలికేమిటి అన్నాడు చిరాగ్గా.. సరిగ్గా మీ మెదడులో మీరూ అనుకుంటున్నట్లే

ఇప్పుడు మీ అమ్మ అదే పిండితోనే చేసిన చపాతి, పూరి నీకు నచ్చినట్లే నాకు కూడా ఆ దేవుడు ఒకే పిండితో చేసి ప్రాణం పోసిన ఆ ఇద్దరూ నచ్చారు.  చపాతి, పూరి లలో రూపులు, షేపులు, రుచులు కాస్త తేడా ఉన్నట్లే వీళ్ళిద్దరి రూపులు, షేపులు, చూపులు, ఊపులు, వాళ్ళు వేసే డ్యాన్సులు, డ్రెస్సులు తేడా ఉండొచ్చు అంతే అన్నాను.

ఏడ్చినట్లే ఉంది నువ్వు నీ చెత్త లాజిక్ అనుకుంటున్నారు కదూ కానీ మా వాడు కన్విన్స్ అయ్యాడు.

జల్లెడ తో నీళ్లు పట్టే మీ వాడు కన్విన్స్ అయినంత మాత్రాన మేము కన్విన్స్ అవ్వాలా అని మీరు అనరు ఎందుకంటే ఇంత కంటే చెత్త లాజిక్ లకు అలవాటు పడేలా చేశాయి మన తెలుగు సినిమాలు

'మరి నీ favourite జయమాలిని' అన్నాడు

పార్టీ  మారుదామనుకుంటున్నాను.

ఇలా పార్టీ మారడం బాగోదు ప్రతిసారి అన్నాడు

మొన్నటిదాకా కర్ర బిళ్ళ ఆడి దార్లో వెళ్లే వాళ్ళ బుర్రలకు బొక్క పెట్టేవాడివి మరి ఈ రోజు అవే బుర్రలు క్రికెట్ ఆడుతూ పగలగొడుతున్నావ్ ఇలా నువ్వు మారచ్చు కానీ నేను మారితే బాగోదా ఇదెక్కడి అన్యాయం అని ఒక దిక్కుమాలిన పోలిక పెట్టి అడిగా.

ఇది నైతికత అనిపించుకోదు, దీనికి నేను నిరశన తెలియజేస్తున్నాను అన్నాడు రాజకీయ వార్తలు పేపర్ లో చదివి తలకెక్కించుకున్న మైకంతో.

నిన్నటికి నిన్న ఎన్టీవోడిని ఆ నాదెండ్ల భాస్కర్ రావ్ వెన్ను పోటు పొడిచి సి.ఎం సీట్ లాక్కున్నప్పుడు హైదరాబాద్ దాకా సైకిల్ తొక్కుకుంటూ వెళ్ళి నిరశన తెలియచేద్దాం అంటే అప్పుడు మాట్లాడలేదు కానీ ఇప్పుడు నేనేదో పార్టీ మారుతున్నానని నైతికత గురించి మాట్లాడుతున్నావ్ అని మా వాడి నోరు మూయించాను

అలా మూడవ కప్పదాటు జయమాలిని పార్టీ నుంచి సిల్క్ పార్టీకి. ఇక సిల్క్ సినిమాలన్నీ చూసి జన్మ ధన్యం చేసుకోవాలనుకున్న నన్ను విధి వెక్కిరించింది.

అవి జయమాలిని, జ్యోతిలక్ష్మి హవా తగ్గి సిల్క్ స్మిత విజృంభిస్తున్న రోజులు. అప్పుడు ఈ కప్ప బావి లోంచి చెరువులోకి వచ్చి పడింది అంటే నన్ను చదువుకోవడానికి పులివెందుల పంపారు. లక్కీగా అక్కడ కూడా రెండు వారాలకొకసారి హాస్టల్ లో వేసే సినిమాల్లో కూడా ఎక్కువగా చిరంజీవి సినిమాలే వేసేవారు కానీ జీడిపప్పు తీసేసి హల్వా పెట్టినట్లు విత్ సెన్సార్ కట్స్ ఆఫ్ సిల్క్ స్మిత పాట. ఉసురు ఊరికే పోదంటారు అందుకే కొన్నేళ్ళకే ఆ స్కూల్ మూసేసుకున్నారు. ఏ మాటకా మాట చిరంజీవికి సినిమాల్లో ఖైదీ ఎలాగో అలాగే ఆ హాస్టల్ లో పెట్టే ఫుడ్ లో పూరి అలాగ. అబ్బో ఆ రుచే వేరు. దీని గురించి ఇంకో టపాలో ఎప్పుడైనా మాట్లాడుకుందాం.